香港之旅

響香港返左黎幾日, 休息左幾日, 終於有D時間可以update下個blog. 講講今次香港之旅既收獲.....

1.) 好耐好耐冇返香港, 今次返去最主要既原因係因為表弟結婚. 兄弟結婚我當然好開心, 亦都叫做有小小幫手. 我覺得佢個婚禮準備得好好, 所有野都叫做好順利. 出奇地表弟D脾氣好好, 真係大個仔. 再一次恭喜表弟佢地 ^_^

2.) 婚禮上見到好多親戚朋友, 大家都問我同一個問題. 四兄弟中俾表弟過左頭, 幾時到我?? -_-" ......... 一個暫時冇答案既問題. 或者細佬先呢. 哈哈~

3.) 今次返去見到細個一齊玩大既friends, 好似家文同阿B佢地. 令我諗起好多好多細個既日子....... 事隔幾年佢地轉變左好多, 個個都大個左 (包括佢地D身形都係).... 唯獨好似只有我一個仲好似個細路咁.

4.) 有晚同阿"大哥"去左食飯, 食德國菜飲德國啤, 同佢講左好多野. 恭喜佢出年五月結婚. 我如無意外應該會返去飲佢果餐, 如果老細肯放人的話........... 仲有多謝大哥餐德國菜. 佢依家做左高層果然唔同D, 想當年我地響Rogers涯既日子. 睇到大家依家都算有份ok既工, 都戥大家開心~

5.) 今次返去有兩樣野想睇: 一就係外婆, 見到佢仲係咁長氣咁囉梳, 起碼証明佢身體都算健康, 頭腦依然勁清醒. 二就係想睇睇細佬響香港生活既環境, 東涌雖然係遠左D, 不過環境算係幾好又近佢返工. 出市區交通都算方便. 細佬屋企都算整齊乾淨. 佢一個人 or 多一個人住(唔知幾時呢?!) 應該都唔錯. 睇佢依家都算適應晒香港D生活, 識得照顧自已, 我都算放心左小小. 希望佢早日達到自已既目標啦.

6.) 去左粉腸屋企玩PS3..... 一如之前所想. PS3真係令人失望. BluRay 亦都唔係靚得去邊. 不過佢果部新既Sony 46" LCD 真係超超正, "靚到爆"..... anyway, 都要多謝佢同佢老婆請左我食幾餐飯, 同陪我條無聊友行街. thank you~~ 見到佢習慣到香港既生活我都覺得好開心.

7.) 唔知點解一落機就響電話度同姑姐講左D野, 佢都俾左D意見我.... anyway 今次返去竟然響百忙中有機會食到姑姐煮既飯, 姑姐煮既野依然係全世界中最好食既. 細個果陣真係生在福中不知福 >.<

8.) 去飲左兩次媽打靚湯, 唔係賣口乖, 真係好好飲. 簡直係超水準表現. 不過今次返去真係超忙, sorry, 冇乜時候陪媽咪 >.<

9.) 今次買左好多野...... 不過冇買到之前打算買既相機, 可能覺得自已用DC既機會小左. 返而買左部電話. 重回SonyEricsson 行列. so far 部K800i 都ok 喎. 仲"害"埋細佬買左部 (要幫佢搵借口)~

10.) 平時上網就接觸得多, 今次有機會去左"電話高人"果樹, 多謝佢送俾我條Handfree線同汽水. 高人玩機既方向同我都有D似. 雖然冇同佢出到機..... anyway, 我會記得我欠你兩罐汽水既~

11.) 今次來回都坐唔到Business Class. 返去果程都ok, 隔離個位冇人坐. 返黎果程就大鑊囉, 坐左個二百幾三百磅都黎緊既肥佬, 坐左我八份一個位. 唔係話歧視, 咁肥既人係唔係應該坐Business Class 或者買兩個位呢??? 不過講開搭飛機, 我覺得今次都算幾好, Cathay D 機艙人員服務都好好, 唔會話知我係坐平價機票而有D乜~

成個Hong Kong Trip 都好開心好忙好順利!!!返到黎vancouver又要繼續博殺.... 殺呀~~~