Shure I2c-m試玩

iPhone可以話係我用過多有牌子聽歌音質最好嘅手機, 其實我要求一Ｄ都唔高, 我覺得iPhone原廠跟機個earphone都已經算唔錯. 不過可能工作同環境唔同, 我D屋企人覺得In-ear式嘅耳機比較適合佢地, 俾我無意中發現左Shure嘅I2c-m, 仲話係專俾手機用. 就等我依個一Ｄ都唔專業嘅人試試佢....

先講優點:
1.) 超平, MSRP US$99, 不過我買到$30. $30買到個Shure嘅耳機, 真係唔打得都睇得. 求其買個雜廠野都要啦.
2.) 佢有built-in mic, 即係可以要嚟講電話啦, 通話都算清晰.
3.) In-ear設計, 隔音當然唔錯啦.
4.) 聽歌音質整體比原廠耳機好, 我唔係太識形容, 對比之下原廠果set比較soft D. anyway, 以US$30嚟話算好值好抵玩

缺點:
1.) 雖然佢係有mic, 不過就冇線控. 唔可以好似原廠耳機咁去㩒聽電話, 收線, 跳歌之類....
2.) OEM跟機得一個size耳機膠, 可能我耳窿細, 行街果陣成日都戴唔穩. 不過要配過個都好平好簡單
3.) 音質係比原廠耳機好, 不過如果係原價買就唔係太值(you will expect more when it’s a $100 earphone). 煲多佢一兩個禮拜睇吓會唔會再好多Ｄ啦.
4.) 條線長左小小

九彩靚佬

頭先去玩左新Nano (4th gen), 九彩顔色有齊, 我就比較鐘意依隻橙金色或者綠色. 依家Vancouver有Apple Store真好, 可以第一時間試新野. 新nano個感覺幾好, 可惜我都係俾iPhone寵壞左, 都係鐘意個screen再大D. 另外, 新iPod Touch仲未有現貨, 睇嚟下星期又要再去, 哈哈~~

i.....Photo......Book

去旅行影左唔小相, 所以砌左兩個星期, 終於大功告成. 利用iPhoto做左本之前去維多利亞嘅相簿, 經過幾日, 今日終於收到, 一本hard cover相簿, 印刷非常精美. 價錢可以話係物超所值, 求其攞出去印本同樣嘅書起碼貴20%以上. 再加上靚仔蘋果logo同超易用iPhoto去做排版, 簡單+細心+精美+易用嘅一站式服務真係得Apple先做得到 ^^

另外, 依本相簿裡面有大約10張相係用iPhone影, 印出嚟嘅效果出奇地好. iPhone冇AF冇花花, 得二百萬像, 但係影出嚟嘅相好多時都令人喜出望外~

We're Next

京奧完左, 跟住就到2010溫哥華冬奧. 雖然我唔係好知佢地有乜比賽項目, 不過我知佢地有幾個強項, 冬奧又小Ｄ國家玩, 今次又有home court advantage, 應該可以攞多幾個獎牌掛. 我都會十卜Vancouver 2010, 而且仲越嚟越鐘意依隻吉祥物Sumi, 佢帶左好多歡樂俾我哋屋企. haha~~

影印機黨又做野: Guru v.s. Genius

影印機黨自從個Vista抄人抄到一鑊泡之後, 佢地將會用三億美金去推廣佢地果鑊泡. 不過都係離唔開做影印機黨, 今次佢地會學Apple Store嘅Genius, 叫M$ Guru. 佢地將會派百幾個依Ｄ Gurus去美國多間Best Buy同Circuit City去幫用Vista嘅用戶. 無論佢地做成點, 我都好會好佩服依班M$ Gurus, 因為Vista嘅問題多到爆, 要做得好真係好難好難. 我間唔中都有幫人執吓D PC, 我可以理解Windows有好多問題都唔容易解決. 不過希望依班Gurus第日遇到難題果陣唔好一味諗住用佢地嘅官方必殺技 - “有問題, 唔駛怕, reformat過部機囉”.

除左依班M$ Gurus之外, 佢地仲拍左電視廣告. 保持到佢地一貫嘅design, 都係老老土土. 唔可以簡單咁帶出個廣告嘅信息. 我都係睇返我嘅”I’m a Mac. I’m a PC”廣告開心Ｄ ^^

一廂情願之high expentation

玩左鴨鋪野幾年, 除左覺得佢地Ｄ野好用之外, 每日跟吓佢地D news同rumors其實都係一種樂趣, 亦都融入左我生活嘅一部份. 每逢有event之前都會傳聞滿天飛, 唔知係唔係睇得多左, 從好多細微嘅報告至到佢地攞嘅專利, 慢慢咁了解多左個”遊戲”. 雖然我唔係D咩專家, 但對好多傳聞心裡都好自然會有分析, 有乜可信有乜唔可信心裡都有數. 但係有時有好多人都唔知點解會有好高期望, 應該話係無理嘅期望, 響冇乜根據下一廂情願去估佢地會出Ｄ咩野, 到公佈果陣冇佢地亂估果樣野出又話失望又鬧......... anyway, 下個星期二又有event叫做 ”Let’s Rock”. 有可能會有新nano; touch可能有hardware upgrade或者減價/同價但加大容量. 個event應該只係會有iPod/iPhone related嘅新野........ 不過都係有人會鐘意傳話果日會有新Macbook / Macbook Pro, 到時冇又話失望啦 @.@

點解點解!?!?! - 嫲嫲: "中仔快D開個3G啦"

依排睇緊溏心2.... 阿嫲嫲, Sa姨佢地好鐘意叫人地開個3G.... 都唔知佢係有心誤導, 定係大部份人對科技有誤解?!?! 定係我低估左佢地對科技嘅了解?!?!? 嫲嫲講話: "中仔快D開個3G啦俾嫲嫲見吓你"...... ok, 我明白嫲嫲想同孫仔玩手機視像通話. 不過諗一諗, 佢叫個孫仔開3G, 咁即係個孫仔當時係用緊2G?? 個孫仔平時用2G, 要視像果陣先開3G? 佢識得平時都熄左3G, 用2G慳返D電?? 如果係嘅話, 佢地都有D常識..... 希望佢地唔係無知到認為3G等如視像通話啦..... 3G只係代表手機上網速度, 冇錯玩視像通話需要比較快速度嘅data speed, 不過其實落機呀西門子將會有改良嘅2G, EGPRS 2會去到1.2Mbps, 2G一樣有能力玩視像.

講開視像通話, 好彩netmeeting女王仲未有機會睇溏心2, 又好彩屋企人同我一樣用iPhone 3G, 暫時可以仲可以避一年半載. 不過我相信有朝一日嫲嫲會遇到勁敵, 嫲嫲一句"快D開個3G啦俾嫲嫲見吓你"將會不敵netmeeting女王金句 - ”個孫要見我,開機”(while孫仔根本冇講過任何野). 有人話識反客為主好強, 我就話識講到主客都係佢仲強. LOL~

menu bar係個問題....

我平時最常聽嘅Podcast都可以話係Leo Laporte嘅This weekend in Tech同MacBreak Weekly, 聽吓佢地幾個專家吹吓水, 除左知多Ｄ學多D之外, 有時佢地都幾搞笑. anyway, Leo佢今個星期帶出左一點就係話Windows Mobile最大問題就係個menu bar. M$初頭個原意應該係想將Windows Mobile做到令人覺得用手機可以好似用Desktop咁, 點知弄巧成拙, 佢地冇諗過電腦同手機硬件有別, UI應該要做返D野配合. 有人會話新果D Windows Mobile機已經唔同左, 好似Samsung, HTC果D機都加左個好似iPhone嘅UI. 雖然會加重部機嘅負擔, 但咁樣起碼個表面會好Ｄ靚Ｄ, 不過依個方法始終就好似將Ｄ垃圾掃晒落床下底之後同人講間屋有幾乾淨一樣. 唔知佢地下個OS會唔會好D呢? 佢地不嬲鐘意用幾年時間去抄人, 睇吓Vista就知啦(不過就抄衰左囉.LOL), 今次一於再抄啦. 講開抄, 佢地初初唔係話Apple嘅App Store概念去賣3rd app有幾唔掂架咩?! 點解依家又話要出個Skymarket???